البرمجة بشكل عام

المقدمة :

اول حاجه هقول مثل صغير
فى 3 اشخاص
واحد بيتكلم عربى =a
والتانى بيتكلم انجليزى =b
والتالت بيتكلم عربى وانجليزى =c

لما الاول يحب يكلم التانى مبيعرفش يكلمه غير عن طريق المترجم الى هوا التالت
اذن
a->c->b
وكذلك العكس
b->c->a

خلينا نسمى دى النقطة واحد (1)

ندخل فى الموضوع

طيب دلوقتى عندنا كمبيوتر
مكون من دواير كهربيه
مبيعرفش حاجه غير انه بيمر في الدايره تيار =1 مبيمرش تيار =0
يبقى اللغة الى بيفهما مكونه من رقمين 1و0 واللغة دى اسمها لغة اﻷلة

طيب دلوقتى الانسان لما يحب يتعامل مع الكمبيوتر هيتعامل معاه ازاى عن طريق اللغة دى وقليل جدا الى بيفهما
فصعب يتعامل بيها
قالو خلاص احنا نشوف لغة وسيطة بين لغة الالة ولغة الانسان
طورو لغة الالة للغة جديدة اسمها الاسمبلى

الانسان يكلم لغة الاسمبلى والاسمبلى تترجم للغة الالة
نفس الى حصل بالظبط فى النقطة رقم واحد

قالك لغة الاسمبلى برضو مازالت لغة صعبه هيا اه بقت اسهل من لغة الاله بس مازالت صعبة
طورو لغة الالة واخترعو لغة وسيطه اسمها لغة السى تترجم لغة الانسان الى لغة الاسمبلى ولغة الاسمبلى تقوم بوظيفتها وتترجم من لغة السى الى لغة الالة
وكذلك لما الكمبيوتر يحب يرد على المستخدم
يرد بلغة الالة والاسمبلى ترجمها للغة السى والسى يفهما المستخدم

رجع المبرمجين قالو احنا لازم نسهل العملية اكتر من كدا واختروعو لغات برمجة جديدة منها c++

وهكذا لحد ماوصولو للغات برمجة شبيهة وقريبة جدا من لغة الانسان

تقدر تسمى الى فات مراحل تطور لغات البرمجة
وملخصها
لغات البرمجة 3 مستويات
Machine Languages .
Assembly Languages.
High Level Programming Languages.

دى مستويات لغات البرمجة

طيب يعنى ايه مبرمج وايه دورة بالظبط
المبرمج دا شخص عادى اتقن احد لغات البرمجه الى بيقدر يتواصل بيها مع الكمبيوتر
المبرمج دا وظيفته انه يسهل عليك تعاملك مع الكمبيوتر
ويسخرلك الكمبيوتر عشان يكون عبدك المطيع الى بينفذ كل اوامرك الى تفيدك فى شغلك وتسهل عليك شغلك

انت عاوز برنامج يدير ليك شركتك ويسجل البيانات عليها ….

المبرمج يقوم بكتابة الاوامر البرمجية للكمبيوتر ويخزنها فى البرنامج
بحيث لما المستخدم يضغط على زرار معين او واجهة معينة يقوم الكمبيوتر ينفذ الاوامر البرمجية الى المبرمج خزنها مسبقا

يبقى دلوقتى وصلنا لنقطه كويسه جدا
عندنا مستخدم عادى بيتكلم بلغة الانسان
عندنا وكمبيوتر بيتكلم بلغة الالة الى اتطورت لاسمبلى واتطورت للغة السى واطورة للغة …… للغة php على سبيل المثال
وعندنا كمان مبرمج الى بيتكلم بلغة الكمبيوتر ولغة الانسان

اذن المبرمج هوا كمان عبارة عن مترجم وسيط بين الكمبيوتر والمستخدم العادى

وظيفته انه بيسخر الكمبيوتر لتلبية طلبات المستخدم العادى ويسهل الاستخدام فى واجهة رسومية بسيطة

لحد هنا عرفنا
يعنى ايه لغة برمجة
بعنى مبرمج
يعنى اية كمبيوتر
ايه علاقة المستخدم العادى بالمبرج
ايه علاقة المبرمج بالكمبيوتر

لحد هنا اخدنا فكرة عن البرمجة بصفة عامة ودورها

اعتذر عن الاطالة فى الكلام بس حبيت ابسط الموضوع

#اتعلم_برمجة_ببساطة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *